Paraire Whaanga 11. Te Noho ki te Upoko-o-tataramoa

Ka hoki anō ki te wā i eke mātou ki tātahi¤, ki te wāhi e kīa rā e mātou, ko te Upoko-o-tātaramoa.

I reira mātou e noho ai, e pakanga ana arā mō te whenua arā te toi karanga ki ngā mahi ā tauiwi ki a mātou. I haere mātou ki reira ki te whakatūtū puehu, kirikiri, hei whakapuritia tērā o ngā toenga whenua. Ka roa tō mātou ki reira me ngā tamariki, ka puta mai hoki ngā ratarata, ngā tangata rongonui, kua tae hoki ki te wā pōti¤. Ka haramai¤ rātou ki kōrā.

Ka mihi atu mātou ki a rātou me aua kōrero katoa e pā ana ki a Ngāi Tama mō ōna takutai moana, me ōna whenua me ōna rawa¤ kua riro...

Ka tono atu mātou hoki ki a rātou, mō o rātou kōrero i a rātou katoa. Ka āwhina mai rātou. Nō te urutanga ki roto i te whare mīere kua kore rātou e mōhio i a mātou. Kua kore e rongona e ngā iwi. Ko te peke me kaha tou te hapū, te iwi ki te whawhai o tātou rawa. He toenga hei tūrangawaewae¤ mō mātou mokopuna, mō ngā tamariki e whakatipu ake, mō rātou āpōpō.

Kia kaha hoki ki te whai te mātauranga, kia pai hoki te pakanga e tātou - te mātauranga ki te mātauranga, te ture ki te ture.

Kua kore rā e rātou whakarongo ki ngā kōrero tuku iho a kui mā a koro mā.
Ahakoa taku kōrero i ngā kōrero tuku iho, e kore rawa te pākehā e āhei ki te titiro mai, ki te whakarongo. E kōrero ana rātou, e kī ana rātou i roto ō rātou nei reo he "fairy tale".

Engari ki a mātou o te hau kāinga, [...] e kāo. E tika tonu. Ahakoa te pai a rātou mā – kei te whiua rātou.

Koia he nui ngā kaupapa kei te haere kei te mahi ai rātou ki tēnei o tō mātou marae. Mai rā anō, taku hokinga mai ki tēnei marae - ka hoki anō ki te manaaki te whānau, te hapū – arā taku whānau katoa. E kore rā rātou e mahue¤ tēnei o tātou marae pani¤.

Taku tuakana, Mātaitai ka mate hoki a ia, ā, ko ahau i tēnei rā e poipoi¤ ana e āwhina i ngā whakatipuranga. I tēnei wā te ārahi rātou ki ngā mahi o te hapū o te whānau me āna tikanga, ērā kōrero.

Kei reira tonu ahau e āwhina rātou: hei whakatū rōpū; hei pakanga ki tauiwi, ā, i te kaunihera¤, ā, i te kāwana. Ko ahau kei muri hei tuarā mō rātou, hei whakawhirinaki¤ mō rātou, hei āwhina, hei kōrero i tōku nei paku mōhio, hei āwhina, hei manaaki i a rātou.