Paraire Whaanga 16. Ngā Mahi i Konei

Nō reira, ēnei tōpito kōrero i ōku wā e whakatipu ana i te wā kāinga nei, i Ō‑poutama, he nui rā ngā mahi - e kore rā te rā e kore e mahi.

Ahakoa he mahi porohīanga¤ he haere ki rō ngahere piki runga ngā hiwi nei i runga hōiho te haere ki te tiki kai. Ō mātou mahi i ērā wā, kāore ko te haere noa iho.

Ahakoa te haere ki tāhaki nei, haere ki te moana, me hoki mai he kete pipi, he kete kai, mā runga hōiho ka pērā anō, me hoki mai he kete karaka rānei, he puhā rānei, he tuna rānei, ā, ahakoa haere ki te ngahere – he kiekie – koia te tino kai reka nei ki ahau nei i ngā marama o Noema a Tīhema ka maoaka ai ngā kai – te kiekie – he tino reka tēnā kai ki ahau.

Ā i ngā māra kai, i tēnei rā kua kore rawa¤ atu rā.
Kotahi te [...] tāku māra kai i roto i taku kāri¤ ināianei.

E kore rā e tino nui tāku māra kai iāianei. Kua kore rā te whānau nei e kai nei. Ka mutu rā taku tanu¤ māra kai nui. Ko tōku māra kai [e rumaki ai] i waho rā i waenganui i ōku putiputi – ko ahau tērā.

Kua ngaro ēnā tū āhuatanga – a heoi anō.

E aroha au ki ngā mokopuna, kei te mātaki i ā rātou kai e kai ō rātou kai. Kāore he ora kai i roto, ka kaikai i ngā wā katoa. Ka hoki mai rātou ki taku taha noho ai, kua kore rā o rātou waea ki tēnei mea kotahi te kai o te ata, ā, te ahiahi, ā waenganui – koia o rātou kai i ngā wā katoa.