Paraire Whaanga 18, Te Hauora

Nō reira, i āu mātou mate katoa, e pā ana mātou ki te mate... he nui ō mātou tohunga wahine – Pare Rārere tetahi. I ā au anō tētahi mate i tētahi rangi rā, ko, tōku korokoro mate puku¤. Ka haere taku whaea kie te kuia nei a Pare, te kuia nō Ruka Rarere. Ka puta māua nei i te whare nei, ka piki noa, i te huarahi, ā, kua tae mai te kuia rā. Ā, whātoro mai he rākau mānuka whakakoikoingia. I kōnā e wawana¤, e tangi ana tōku waha hāmama¤ ana. Āna karo¤ mai rā, ā, kua pai a Randy!

Kua hoki mai – ā ko te pākia taku mahunga e tōku whaea, he aha tāu nei tangi – arā! Kua pai koe!

Kāore ō mātou haere ki te tākuta i ērā wā, koinei rā ō mātou tākuta ko ngā tohunga nei.

Nāwai rā e haere ana, ā, kua tae mai te ture a te Pākehā, te whakakore i ngā tohunga nei. Kātahi ka haere huna mātou e haere mā runga hōiho ki ō rātou kāinga kia kore e mōhio te Pākehā kei te haere mātou ki ō mātou tohunga kia mahi ai mātou.

Te whakamanatanga a te ture, e kore ō mātou kuia, koroua e taea ki te mahi i ērā mahi. Kua hāmenetia¤. Engari, te pai o mātou e haere kōnihi¤ mātou ki a rātou, ā, ka haramai¤ kōnihi mai ki te kāinga nei ā ka mahi ō rātou mahi.

I a mātou, ka pai iho tērā, ā engari te taha ki te Pākehā, he pai kino tērā. Ehara. E eke ki ō rātou ture kia mā, kia horoi i ngā taputapu katoa e mahi te tangata. Ki au – e kī – tērā kuia, i haramai ki te mahi i taku puku e whātoro, e whati te rākau mānuka nei rā, e heke haere mai, a ka whakakoi mā te naihe¤ noa. Ko ahau nei e auē ana, ā, ko taku koro kua ora mai te puku nei me te korokoro.

Nui nā i ngā kuia, ngā koroua, nā te ture i whakakore, engari ko te whenua noho tonu mātou ki te haere ki whea¤ ki whea.

Koirā¤ te pai o te whānau – pūmau¤ i tērā wā ki ngā tikanga o tātou kuia koroua.