Paraire Whaanga 28. Tunanui, me Poutini

Arā anō tētahi o ngā wāhi tapu i tua mai i te Whānau-a-te-hau. He puke, he tino nui i tērā wā o mua. Nō te karitanga mahitanga¤ i te huarahi mō te tereina nei, ka turukingia¤ te maunga ki raro.

Koira te ingoa o tērā maunga, ko Tunanui, me Poutini. He mauri anō nā Ruawharo i tanu¤ i reira, tēnei mauri – he whetu – ka rere, ka rere ki te rangi.

Koirā¤ tōna kāinga. Ko Tunanui e rere pēnei i te tuna nei, e kaukau ana i te rangi.

He tohu tēnā ki a ia. Ko Poutini, ka rere atu, ā, ka pakō ka pakō ai¤. Koia rā ētahi o ngā wāhi tino tapu e pāngia e te Pākehā, arā, mate te Pākehā i reira.

Ahakoa i kōrero ngā pakeke kauaka e raweke¤ i taua maunga, kāore, kāore e whakarongo te Pākehā, ā mate mai tētahi i reira.

Kei konei tētahi o ngā ingoa, he huarahi kei muri – te huarahi e haere atu ki Mōrere, Ko Tunanui. Ehara te tuna nei e kai nei tātou, [engari mō tērā], ko ērā tōna tohu, he whetu, he whetu tohu mā ngā tohunga e mōhio ngā kōrero mō ērā whetu e rua.

I ā mātou, i ahau, i te wā i a au e whakatipu ana kua kite au i ērā whetu. Menā ka kite koe i tētahi, he tohu, he manuhiri, he ope kei te haere mai. Me ka rere ngā tokorua, ka [paku] mai ana he tino raruraru. He mate, he tino mate nui kei te haramai¤.

Ka mārika¤ au i tērā wāhi i pā mai hoki te whiu a te moana ki konei, arā i taua wā i puta ai aua whetu e rua. Koirā taku tino mōhio mō tērā, mō tērā wāhi tapu.