Ko Paraire Randolph Whaanga

Whakauroa

A tihei mauri ora
Tihei uri uri
Tihei nako nako
Ka tau ka tau iho papa i raro nei
Nei ka tau te Rangi e tū nei
Ko ai e rukuhia Manawa pōroa
Ko ai i rukuhia matuku mai Rarotonga
Whakatinatia te more ki Hawaiki
E pūpū ana hoki
E wawau ana hoki
Tārewa tū ki te Rangi
Aue! Eke! Eke Tangaroa
Eke Pānuku
Haumi e
Hui e
Tāiki e

Tēnā rā tātou katoa

Ko Paraire¤ Randolph Whaanga tēnei e mihi atu nei ki a koutou
I heke mai i ōku mātua, ko Niri rāua ko Keita
I whānau mai ahau i roto i ngā māra kai i Rau-mako - te rā tekau mā rima o Hanuere. (Tekau-mā-iwa) Toru tekau mā iwa te tau.

Ko aku tau i tēnei rā e kōrero nei au e mihi nei au e ono tekau mā whitu.
Ko taku whānau nui tekau-mā-rua mātou katoa. Ko ahau te teina o ngā teina-tuakana tokowhitu. Ko ahau te mutunga o rātou. Me ōku tuahine e rima rātou kei te ora i tēnei rā.

Na, e huri ake nei au i runga i ngā patai pātai1 e pātai atu mō ōku nohotanga iho nei i roto Ō‑poutama.

I haere mai mātou, arā , i whai haere mai i tō mātou whaea, me tō mātou pāpā, ā, ka tū te whare nei ki Ō‑poutama. I kuraina¤ ahau i konei i te kura i Ō‑poutama. Ka hokihoki mātou, te mokemoke¤ mai o tōku whaea ka hoki anō mātou ki Rau-mako ka hokihoki mai ki Ō‑poutama. Engari te wā i tōku whakatiputanga¤, i konei te nuinga, i ēnei kāinga e rua.

Na, i roto i taku whakatiputanga i konei i Ō‑poutama i te wā i kuraina ahau. Ka haere mātou mā runga hōiho ki te kura.

Nō te tūtanga¤ a te whare nei, nā te Māori. I kōkiri māori nei e tū nei te whare nei, e noho nei au, e kōrero nei ahau ki a koutou. Koinei te mutunga nei te mutunga o ngā whare nei i tū rātou mō tātou te iwi Māori.

Na, i tērā wā, i haere au i te kura i Ō‑poutama nei, he nui ngā pakeke me ngā kuia, koroua i tēnā. Ka riro ahau i tētahi o ōku kuia tīpuna... a... ko Paemata, ka haria ahau ki tōna taha whakatipu ai. Koia te tino kuia, tino rangatira tipuna, i moea e tō mātou matua koroua a Tītoko (ehara i te whānau).